كل واحد فينا له دور اجتماعي مُهم ، محد عالة على المجتمع إلا اللي رضى لنفسه هالشي ..
ولأن دورك مهم فـ خدمتك الاجتماعية مهمة، وتحسينك للعالم مطلوب وانسانيتك ومشاعرك واجبة عليك كانسان👌🏻
كل واحد يحبّ انه يقدم خير و يساعد ويحسن العالم والموضوع مو صعب - الكل يقدر -
لأننا دايم نحبّ الحياة في سلام و يزعجنا مظاهر المجاعات أو الحرب أو الحزن أو أي شي يمسّ الانسانية ..
ولكن كـ اُناس عاديين ما عندنا شي نسويه لهم
أقل ما نقدّمه لهم الدعاء ..
وفي مكان آخر من العالم نحاول نعيش حياتنا بشكل طبيعي ونتناسى -رغم انسانيتنا-
بس أنه بيدينا نسوّي شي ونخلّي العالم أحسن ..
كيف ؟ هل نقدر نتطوع ؟
الإجابه بكل تآكيد نعم
التطوع ماله شكل معين أو أنه فعل ثابت .. التطوع بيقدر عليه كل انسان ..
في بيتك ، في الشارع ، في الدوام ، في كل مكان ..
نبدأ بمُحيطنا أول شي و من حيث نجِد قُدراتنا ..
أيّ خير تسويه بدون مقابل هو تطوع بإختصار ..
لذا في هذا اليوم حابة أأكد لكم أنكم تقدروا تتطوعوا
بس خلوني أقول لكم أن التطوع يفيدك كـ شخص أولًا ، أبداً ما اعتبره عطاء من غير مردود..
يخليك تجرب وتتعلم وتعرف اكثر وتختلط بأشخاص مُختلفين ..
و رؤية 2030 تهدف لأن يكون بالسعودية مليون متطوع 😍🇸🇦
هذا لأنه اكيد شي مهم، و إحنا قدّها اكيد 💚
فيه التطوع الخاص/الشخصي :
مثل التبرع بالدم ، آو توزيع إفطار الصائم أو توزيع الماء ، أو تنظيف البيئة والعناية بها، أو إطعام الحيوانات .. أو أو الخ
ومنها كذلك التطوع في تخصصك ، سواءًا تعلّمه لأحد أو تعطي الناس نبذه عنه او تطوره ..الخ من فرص ..
هذي من الاشياء البسيطة اللي قادر تسويها بنفسك بدون اي تدخل او صعوبة ، عبر التويتر مثلًا او في الجامعة او حتى مع اصدقائك .. غير هذا تقدر تشارك مع فريق تطوعي ايضًا بناءًا على تخصصك او هوايتك او موهبتك
فالتطوع موجود في كل مجال 🌟
- هل فيه أنواع ثانية للتطوع ؟
- نعم
* فيه تطوع ميداني وهو :
التعاون مع فريق تطوعي يعمل في مجال خدمة مجتمعية معينة في الميدان مثلًا مستشفى/جامعه/مكان عام/دار/الخ ، وفيه فرق كثيرة ومجموعات ومؤسسات خيرية وجمعيات، تقريباً هو أكثر مجال تلاقي فيه فرص تطوعية ومتنوعة ورسميّة
* فيه تطوع الكتروني وهو :
عن بعد ، يعني من خلال الجوال او اللابتوب .. فيه مجالات كثيرة منها اللي تحتاج موهبة "المونتاج مثلا" ومنها اللي يحتاج حماسك وفاعليتك"التسويق مثلاً" ومنها اللي يحتاج دورك الاجتماعي "الاشراف مثلا" ومنها اللي يحتاج خبرتك "التقنية مثلًا" المجال كذلك متنوّع و لا يقلّ أهميّه عن باقي أنواع التّطوع
* فيه تطوع اغاثي وهو :
وهو المساعدة للدول الفقيرة اواللاجئين عبر مشاريع وبرامج مختلفة اغاثية وانسانية تساعدهم وتخفف معاناتهم ..
و أحد هذي الجهات الرسمية في السعودية هي مركز الملك سلمان الاغاثي 💚
https://www.ksrelief.org/
ملاحظة بسيطة: لو حابين أكتب عن التطوع الاغاثي في تدوينة منفصلة ارسلوا لي بآرائكم
وأيضا لو فيه أحد بالمجال نفسه وحاب/حابة يشاركني في التدوينة أرحّب بهالشي
و في هذي التدوينة تفاصيل اكثر اذا مو عارف تحدد المجال المناسب لك في التطوع 👌🏻❤️
http://mjdah.blogspot.com/2019/02/blog-post.html
إقتباس بالنهاية :
"أمنيتي لك هي أن تستمر ، أن تستمر بكونك الشخص الذي أنت عليه ، أن تُذهل العالم القاسي بأفعالك الطيّبة ، وأن تستمر بالسماح للعطاء بأن يخفف الحمل عن قلبك الرقيق" 🌟
ليست هناك تعليقات:
إرسال تعليق