خطة العام الجديد ! كيف تحققّ أهدافك | ٢٠٢٠

حبّيت أشارككم خطّتي السنوية ومثل كل عام ، ما أحب أكتبها لكم إلا بناءاً على تجربتي لها..

هذي التدوينه فيها خطتي لعام ٢٠١٩ والحمدلله كانت حلوة معاي وحققت اللي كتبته كلّه

و اتوقع راح انفذ نفس الخطة لهالعام ٢٠٢٠

هالسنة اللي راحت كنت مرّة مستعجلة في تحقيق الأهداف و سوّيت كل شي خلال نصف العام الأول، 

وهالشي شجّعني إني أكتب خطة ثانيه بنفس الطريقه و أكّمل بها باقي العام 

زي ما دايم أحب كل سنة يكون لي فكرة مختلفة لكتابة الخطة السنوية 

وهي أبسط خطة سويتها للآن واعتمدت على هالشي لأني أكره التعقيد والضغط وهالأمور 💆🏻‍♀️

تحقيقي لأهدافي هذي السنة اعتمد على التّدرج !

كيف التّدرج وإيش هي فكرتي فيه ..؟

هي ببساطة /

ثلاث أهداف بشكل عام على مستوى حياتي تُشكّل الأهم بالنسبة لي :

١- عندي هدف كبير و هو أساسي |

٢- و بعده هدف وسط | 

٣- و بعده هدف صغير | 

وثمّ بعدها أهداف يمكن تكون عاديّة -إذا صحّت التّسمية- بس هي أهداف بعد

 لـ باقي مجالات حياتي مثلا مجال العمل ، مجال التطوير الشخصي ، مجال المعرفة ..

نفس الشي ثلاث أهداف مدرّجة أو الكفاية أنها تكون ثلاثة

الهدف الأول وهو الكبير و الصعب و اللي يحتاج وقت طويل ، يمكن نصف سنة و هو الأساسي أيضاً

والهدف الوسط هدف معقول و له أهمّيته و لكن ما ياخذ وقت طويل لإنجازه أو الإلتزام به

والهدف الصغير هدف بسيط ما ياخذ وقت أو يمكن أسويه بأي وقت ، زي مثلًا قراءة عدد من الكتب أو الكتابة وكذا..

نجي للتحديد ..

كم هدف نكتب و كيف نوزعهم؟

*أهم شي أهم شي التّنوع بالنسبه لي أشوفه ضروري والأهم توزيها

كيف تحدده ؟

من خلال الإجابة على هالسؤال :

كم عندك مجال في حياتك حابب تطوّره و يكون لك فيه أهداف ..

مثلًا أنا ضمن الأشياء اللي حددتها

حددت للعمل التطوعي + للثقافة + لتطوير نفسي + لمستوى التفاعل + للتدريب + للرياضة + غيرها

حدد المجالات اللي تهمك و اكتب لها ثلاث اهداف متدرجة .. 

أو أكتب الأهداف الكاملة اللي عندك ثمّ رتّبها بعدين ووزّعها

الأهم في هذي الخطة وكل الخطط صراحةً هو: الـرجوع لها كل فترة 

-

الإضافة الجديدة:

حبيت بعد أضيف شي جديد عمري ما فكرت بترتيبه في حياتي..

ألا وهو الـ Money 🌚🤷🏻‍♀️

-  الصرف

حددّت مقدار معيّن و أحتياجاتي الأساسية .. 

المقدار "من كذا لـ كذا" و الاحتياجات لها قواعد ما أتخطاها

و كتبتها..

حددّت تكون نسبة ١٥٪ من إحتياجاتي المهمة هي اللي لازم تتحقق بشكل كامل ١٠٠٪

بس تعقيبًا على هذي النقطة أنا مو من النوع اللي يشتري بسرعة أي شي لازم أفكّر "غالبا مو دايم"

لذا شي مهم لي أني أحدد الاحتياجات عشان أفكر فيها ثم أختار .. 

كانت اضافة حلوة بس ما أفكّر إني راح اسويها للعام الجديد ، 

ما استفدت بشكل كبير منها لأن الصّرف عندي متّزن والحمدلله أموري تمام من قبل اصلا ، 

بس يمكن تنفع الموظفين والطلاب أكثر مني اللي عندهم دخل ثابت شهرياً.. 

أو ما يعرفوا يتحكّموا بالفلوس وللمعلومة فيه مقالات بهالمجال يمكن تستفيدوا منها وتساعدكم ابحثوا عنها..

تحدّي بسيط لنفسك :

شي مو ضروري يكون من الخطة بس أنا حبيت أحطه ، و هو شي صعب أسويه - تحدّي لنفسي -

"أتفقت أنا و نفسي إني ماراح أقصّ شعري طيلة العام لين يطول - بإستثناء مرة واحدة فقط لتعديله - عاد أنا أحب شعري قصير ، وبأشوف اذا بأصمل على تطويله"

| هالسطر كتبته العام الماضي ولما شفته اللحين ضحكت أمانةً 🤣🤣🤣 أوكِ صملت بس مرّة واحدة ما تحتسب إني فشلت صح؟🌚 طبعا هي غير عن المرّة اللي قلت فيها بعدّل شعري بس 💇🏻‍♀️ يعني مرّتين بس 

هالعام بأحط تحدّي أصعب وأكيد ماله علاقة بالشعر ونشوف 😆

قائمة جديدة :

سمّيتها "الإلتزامات" هي أشياء تسوّيها كل يوم أو كل أسبوع و تساعدك على تحقيق الثلاث أهداف الرئيسية ولو بشكل غير مباشر

تقدر تكون عادات ، مثلاً لو دينية زي الأذكار أو الإستغفار والدعاء الخ

وتقدر تكون علاج مشكلة عندك أو تقدر تخلّيها أشياء تسعدك ..

تعلّمت ثلاثة أشياء جديدة من هالسنة وأبغى أشارككم فيها بعد :
١- الأحلام العظيمة تأخذ وقت ، لازم نعطيها وقتها ، وناخذ وقتنا الكافي فيها بعد 👌🏻
٢- إذا شعرت برغبة في أنك تتخلّى عن أحد أحلامك أو أهدافك لأنها ببساطة ماعادت تستهويك أو حتى غيرت رايك فـ تخلّى عنها .. مو ضروري تعافر"تحارب" في شي طايب خاطرك منّه ، والحياة أبسط !
٣- بيقولوا ظروفك لك لوحدك ، ولا تعامل الناس بناءاً على مزاجك والخ.. وكلها صح بس تذّكر دامها ظروفك لوحدك وركّز على كلمة "وحدك" هذا يعني لا تقلل من قيمتك أوتنساها ، هذا يعني لما تحتاج راحة إرتاح لأنك لوحدك ، هذا يعني لما تبغى شي " أي شي " سوّه ، لأنه لك لوحدك


أتمنى استفدوا لو شي و الهمتكم في حياتكم ✨
بيسعدني جداً لو تكتبوها أو تطبّقهوها ثم ترسلوها لي أشوفها
وسنة حلوة لكم ولأحلامكم كلّها


الصور الجاية كانت من ضمن صفحات الخطة اللي سوّيتها..
وفيه أشياء محذوفة أعذروني 🌞💛