في فترة سابقة و كـ أي أحد مرّيت بفترة خفوت تحديدًا في مجالي الكتابي ، وكان شيء صعب جداً بالنسبة لي لدرجة توقعت ما بأقدر أكتب مرة ثانية ..!!
هذي التدوينة هي لأي أحد يمرّ بهذي الفترة في مجاله أيّا كان أو الشي اللي يحب يسويه - وأتوقع أنها فترة صعبة على الجميع خصوصا بظروف الدراسة عن بعد والعمل وغيرها...- نوعًا ما التدوينة مفيدة للكُتّاب أكثر لأن بأذكر فيها مواقفي ، و لكن يمكن للجميع قرائتها والإستفادة 💚
طبعًا أكيد تعرّضت لإحباط فوق الإحباط اللي ساعتها.. و دوّرت عن طرق كسب الإلهام و إرجاع الشغف ، بدايةً كانت أمور ساذجة و غير واقعية من وجهة نظري و ما فادت معاي غير أمور أنا جربتها - حتى في غير الكتابة -
يالله نبدأ فيها 😍✅
١- جددّ طريقتك / و إذا كاتب جددّ طريقة كتابتك :
من الأمور اللي فادت معاي بشكل كبير ، هي اني بفترة الاحباط هذي كتبت رواية لأول مرة في حياتي و ساعتها حطيت في بالي ما راح احد يقراها على الاقل بهذي الفترة لين اتجاوزها وممكن انشرها لاحقا لأن الامر هو باختياري، وكتبت بحرّية و أريحيّة أكثر بحيث أنها صارت ب أكثر من لهجة و لغة وقصائد ومرّة حوسة 😆 مع ذلك كانت انجاز جميل وشعور أفضل
٢- افعلها بشكل مختلف / لا تكتب باسلوبك المعتاد :
من كتابة الرواية تعلّمت أن أكتب بشكل آخر و جنس آخر و حياة أخرى .. وهالشي حسّن منّي و من أسلوب كتابتي بحيث أنه وافقت كل التغيّرات بسلاسة ما كنت أتوقع بأقدر و لا كنت أعرف مهاراتي من هذي الناحية !😅
٣- هيئ نفسك :
ساعد نفسك على الاستلهام بطريقتك، ممكن يكون بالجلوس في مكان تحبه و هدوء و قهوة تحبها .. يعني باللي هو يناسبك و تحسّه جوّك ك كاتب و يخلّيك تروّق 💆🏻♀️
٤- تذكر أن اللي تسويه اللحين محد بيشوفه غيرك حالياً / مسوّدة خاصة :
على الأقل راح تكون فيه نسخ جاية وهذي النسخة خاصة لك و مبدئية وبتقدر تعدلها وتضبّطها و تعيدها لو لزم ، يعني خذ راحتك فيها👀
٥- لا تضغط على نفسك/اترك الكتابة تجي لك من نفسها :
لا تبدأ بتصنّعها أو حتى مراقبة الوقت و اللوم .. اتركها تبدأ من نفسها و اترك لك وقتك فيها وفرصتك الكافية ، خصوصاً لو ذهنك مشوّش و ما تقدر تنجز شي.. بيكون صعب بس تعوّد 💪🏻
٦- اضغط على شعورك بذكرياتك :
استغل فكرة المشاعر سواءًا بذكريات تستذكرها أو تشوف صورها أو مكان تروح له و فيه ذكريات..الخ و في الكتابة ممكن تبدأ بكلمة عشوائية تطري على بالك و بعدها تكمل الجملة ↗️
٧- لا تشتكي لأحد من هذه الفترة :
فترة الخفوت صعبة اعرف هالشي، ولكن باختصار الناس غالباً راح يزيدوا احباطك لأنه دائما بيتوقعوا منك الأفضل وممكن ما يقدّروا لك هالشي اللي انت تمرّ فيه ⚠️
٨- راجع أعمالك السابقة و أهدافك :
هذي الخطوة تجدد في دمائك شعور الانجاز، و تحفّزك للتقدّم ، و أما الأهداف فهو شي ضروري تذكّر نفسك فيها في كل مرحلة حتى لو باقي أنت بعيد عن هدفك أو لو قريب، خلّها قدامّك 📖✨
٩- بعد الانتهاء من عملك اتركه مدّة قصيرة :
لا تراجعه بنفس الوقت خلّي مخّك يصفى بالأول، وعيش الانجاز، ثم ارجع له لما تحسّ أنك تمام و ماراح تتهوّر وتغيّر شي بالغلط أو تتهوّر وتحذفه <كثير صارت لي😓 أما بعدها تقدر ترسله أو تشاركه أو اللي تبي تسويه فيه كيفك 😚
١٠- اصنع لك جدولك يخليك تستمرّ بشكل يومي :
في تجربة كتابة الرواية كان عندي جدول لمدة أسبوع تقريباً، في هالأيام كان لازم أكتب كل يوم بارت كامل، وحددّت التوقيت وهو يومياً بعد الظهر أو بعد العصر حسب ساعات الفراغ ، و المدّة لا تقلّ عن ساعة .. و أيضاً سمحت لنفسي بهذا الجدول بوقت إضافي ممكن أستكمل الكتابة فيه لما أكون أقدر و جاني إلهام للمواصلة أكتب على طول مو لازم انتظر لليوم الثاني.👍🏻
و أنتوا وش أكثر طريقة تستخدموها عادةً ؟🤔
وإيش رايكم بتجربة الرواية؟ لو أنزّل الرواية بالمدونة مين متحمس بيقرأها؟ 🤩😍
ليست هناك تعليقات:
إرسال تعليق